«Վեգա» ընկերության մարքեթինգի և զարգացման բաժնի տնօրեն Արթուր Չոբանյան
«Վեգա» ընկերությունը բիզնեսը սկսել է ընդամենը 190քմ փոքրիկ խանութից, իսկ այսօր ընկերությունը պատրաստվում է անցնել արդեն հիպերմարկետի ձևաչափին: Մարքեթինգի և զարգացման բաժնի տնօրեն Արթուր Չոբանյանը պատմում է, որ 2008 թվականի համաշխարհային ֆինանսատնտեսական ճգնաժամից հետո «Վեգան» գրեթե կործանման եզրին էր, բայց հաջողացրել է ոչ միայն վերածնվել, այլև դառնալ Հայաստանի ամենաարագ զարգացող ընկերություններից մեկն ու կենցաղային տեխնիկայի և կահույքի ոլորտում համարվել բացարձակ առաջատար:
-Որո՞նք են հաճախորդին գրավելու ընկերության տարբերակները:
-Գովազդային բոլոր միջոցներն օգտագործում ենք՝ սկսած ֆեյսբուքից, ընկերության կայքից մինչև բաներայի գովազդ: Շուկան վերջին տարիներին ավելի քաղաքակիրթ է դարձել, և հաճախորդին գրավելու տարբերակ են դառնում ոչ միայն ապրանքի գինը, այլ նաև գեղեցիկ վաճառքի սրահը, բարձր մակարդակով սպասարկումը, ապրանքատեսականու շարքը, ընտրության հնարավորությունը: Այսօրվա գնորդը բավական բանիմաց է և պահանջկոտ:
-Ո՞վ է ընկերության գնորդը՝ որակի՞, թե՞ գումարի չափի հասանելիության հետևորդ:
-Կարող եմ վստահ ասել, որ «Վեգա» պատրաստ է բավարարել սպառողների ամենալայն շրջանակը: Ընկերությունն ունի ապրանքատեսականի ամենացածր գին փնտրող մարդկանց համար և ունի համաշխարհային ճանաչում ունեցող A դասի բրենդներ այն մարդկանց համար, որոնց համար գինը բացարձակ նշանակություն չունի, այլ առաջին տեղում որակն է, հանրաճանաչությունը, իմիջը:
-Ինչպիսի՞ մրցակցություն կա շուկայում, և ինչպե՞ս եք Դուք աշխատում գնորդի հետ:
-Գնորդի հետ ընկերության հարաբերությունը սկսում է այն պահից, երբ նա մտնում է սրահ և ավարտվում այն ժամանակ, երբ գնորդը ստանում է իր ապրանքը ժամանակին՝ առաքման ծառայության միջոցով, շարունակվում է, երբ խնդիրներ են առաջանում գնված ապրանքի հետ: Այսինքն՝ մենք համարում ենք, որ գնորդի հետ հարաբերությունը երկարատև է: Քանի որ այսօր ինտերնետում կարելի է գտնել ցանկացած ինֆորմացիա, ընկերության սպասարկողները, խորհրդատուները պարտավոր են իմանալ այդ ամենը և մի փոքր ավելին, որպեսզի գնորդը վստահ լինի, որ անիմաստ ժամանակ չի կորցրելու՝ կազմակերպության սրահ գալով: Նա պետք է ստանա համացանցում ներկայացվածից ավելին: Հաճախորդը հնարավորություն ունի գնած ցանկացած ապրանք հետ վերադարձնել խանութ՝ առանց որևէ պատճառաբանության կամ փոխանակել մեկ այլ ապրանքով: Եթե հաճախորդը կողմնորոշված չէ բրենդն ընտրելու հարցում, նա հնարավորություն ունի մեկը վերցնել ու փորձել, այնուհետ փոխարինել մեկ այլ բրենդով: Հաճախորդը պետք է իրեն հարմարավետ զգա: Վերջին տարիներին շուկայում տեղի են ունեցել կտրուկ փոփոխություններ, որոնք նպաստել են շուկան քաղաքակիրթ դարձնելուն: Շուկան փոքր է, և ոլորտում ագրեսիվ մրցակցություն կա: Բայց մենք բոլորս պետք է գիտակցենք, որ մրցակիցներ ենք, բայց ոչ թշնամիներ և փորձենք ավելի քաղաքակիրթ մեթոդներով զարգացնել շուկան. ցածր գին կարող են առաջարկել բոլորը: Գեղեցիկ դիզայնն ու PR-ը մարդուն սրահ բերելու առաջին խայծն են, սակայն գնորդը պետք է երաշխավորված լինի խաբեությունից:
-Արդյո՞ք, ընդունված կանոնի համաձայն, մաքեթինգի արդյունքը գնման հակված ապառողն է:
-Մարքեթինգի գլխավոր նպատակը բերել գնորդին այն վիճակին, որ նա պատրաստ լինի գնում կատարել, պատրաստ լինի կատարել երջանիկ գնում: Հաճախորդը հաճույքով պետք է հրաժարվի իր փողից և վստահ լինի, որ չի գերավճարել և ստացել է համապատասխան սպասարկում, հակառակ դեպքում՝ մենք կարող ենք չարաշահել մարքեթինգային գործիքաշարքը, մարդուն բերել ստիպողական գնման՝ զոհ դարձնելով գերագրեսիվ մարքեթինգի:
-Բիզնեսը կայացա՞ծ եք համարում:
-Միանշանակ, քանի որ միայն կայացած բիզնեսն է ի վիճակի 4 տարի անընդմեջ հետաքրքիր տեմպով գրանցել անընդմեջ զարգացում:
-Գործում եք ի շահ գնորդի՞, թե՞ ի շահ բիզնեսի:
-Հնարավոր չէ բիզնեսը չգործի ի շահ իրեն, ոչ երանի այն բիզնեսին, որը կմոռանա իր շահի մասին, այդ դեպքում այն ուղղակի կկործանվի: Սակայն, այստեղ կա նուրբ բալանս՝ պետք է գործել ի շահ գնորդի և ի շահ բիզնեսի միաժամանակ: Բիզնես մոտեցումը բոլոր տեղերում նույնն է: Կա արտադրող, կա ծառայություններ մատուցող և կա սպառող, այստեղ շատ հստակ պետք է հասկանալ, թե քո կազմակերպությունը ո՞րն է և ճիշտ կատարել քո գործառույթը:
—Եվ Ձեր կազմակերպությունը ո՞րն է:
-Այս պահին կահույքի ոլորտում Վեգան համարվում է խոշոր արտադրող, իսկ էլեկտրոտեխնիկայի ոլորտում՝ խոշոր ներմուծող և վաճառող:
—Ի՞նչ կասեք Ձեր կազմակերպության գնորդներին:
-Նախևառաջ շնորհակալություն եմ ուզում հայտնել, հետո՝ ներողություն խնդրել բացթողումների համար, անհնար է չունենալ բացթողում, եթե անգամ դու շուկայի առաջատարն ես:
Հեղինակ՝ Մարինե Գասպարյան
