Morgan Consulting Agency-ի տնօրեն Դիանա Ավետյան
Սոցցանցերը հասանելի են գրեթե բոլորին, սակայն քչերն են լիովին տիրապետում դրանցում բիզնես էջեր վարելու բոլոր նրբություններին: Ամենամեծ սխալը, որ բիզնեսները հաճախ թույլ են տալիս հետևյալն է` նրանք սկսում են սոցցանցերով իրենց մարքեթինգն, առանց գաղափար ունենալու, թե ինչպես են այն օգտագործելու: Եվ միայն աղոտ հույս ունենալով, թե եթե պարզապես սկսեն գրառումներ անել մի քանի սոցցանցերում միաժամանակ և շատ հաճախ, ապա ինչ-որ ձևով, ինչ-որ ինտերնետային հրաշքների միջոցով, իրենց ընկերությունը մի գիշերում կաճի ու կդառանա բազմամիլիոնանոց բիզնես: Ստորև ներկայացնում ենք սոցցանցերում գրագետ մարքեթինգի մի քանի գաղտնիք:
Նախ պետք է վերացնել այն էջերը, որոնք բացվել են որպես անձնական էջ ու օգտագործվում են որպես բիզնես էջ: Ֆեյսբուքը նման էջեր հայտնաբերելիս, արգելափակում է: Եվ առհասարակ դա գեղեցիկ չէ ու պրոֆեսիոնալ չէ: Նրանց համար, ովքեր չեն ուզում ժամանակ ծախսել անձնական էջերի վրա, ֆեսյբուքն ունի Business Manager հարթակը, այսինքն` միանգամից կարելի է բիզնես էջ բացել ու ժամանակ չծախսել ու չտարվել անձնական էջերով: Ֆեյսբուքն ունի 2 ծուղակ.
- Ժամանակատար է, այսինքն` մի բանի համար մտնում ենք, մոռանում ենք ու շատ ժամանակ ենք ծախսում նաև այլ բաների վրա: Դրանից խուսափելու ձևը Business Manager-ով աշխատելն է:
- Սեփականության հարցն է: Ֆեյսբուքյան ձեր էջը ձերը չէ, այլ ֆեյսբուքինն է, այն կարող է և արգելափակվել:
Մի քանի խորհուրդ, թե ինչպես ճիշտ կառավարել: Նախևառաջ պետք է ճանաչել` ում համար եք գրում, և հետևորդներն ովքեր են ու հետևել, թե նրանք ինչ են հավանում ու ինչ տալ նրանց: Դրա համար կարևոր է, որ բիզնեսը պատկերացնի ինքը ինչ արժեք է տրամադրում վիրտուալ աշխարհում: Բիզնեսը պետք է որոշի իր ներկայությունն ինչ թեմայով է և այդ թեմայով հնարավորինս շատ արժեք տրամադրի, ոչ թե անընդհատ գովազդի կամ զեղչերի մասին տեղեկացնի: Նույնիսկ ասում են, որ ճիշտ հարաբերակցությունը հետևյալն է 80-ը 20-ի: Այսինքն` փոստերի 80 տոկոսը թող լինի արժեք տրամադրել և միայն 20 տոկոսը լինի ձեր գովազդը: Որովհետև երբ մարդիկ 80 տոկոս լավ նյութ են ստանում, որն իրենց օգտակար է, համաձայն են 20 տոկոսը հանդուրժել ձեր գովազդը: Գովազդը նույնպես պետք է ուղղված լինի հատուկ թիրախային լսարանին: Գովազդների դեպքում մի ինդեքս կա , որը կոչվում է Relevance Score, այսինքն` որքանով է տեղին ձեր գովազդը ձեր լսարանի համար: Դրան պետք է անպայման ուշադրություն դարձնել: Դուք, գովազդի արդյունքներին հետևելիս, պետք է նաև դրան ուշադրություն դարձնեք: Այդ ինդեքսը շատ հստակ ցույց է տալիս, ձեր գովազդը խոսում է ձեր լսարանի հետ, թե ոչ: Եթե այդ ինդեքսը ցածր է, նշանակում է, որ անտեղի գումար եք ծախսում ոչ ճիշտ գովազդի վրա: Ցանկացած դեպքում` վճարովի, թե անվճար, հարկավոր է առաջին տեղում, կենտրոնում դնել հաճախորդին և իր հետաքրքրություններն ու ցանկությունները:
Ինսթագրամն ամնաարագ աճող հարթակն է, ճիշտ է օգտատերերի քանակը առայժմ պակաս է ֆեյսբուքից, բայց այն աճի ամենաարագ տեմպն է ցույց տալիս, իսկ օգտատերերի միջին տարիքը 35-ից ցածրն է: Դա նշանակում է, որ եթե դուք բան եք առաջարկում երիտասարդ սեգմենտին, այն հրաշալի գործիք է, բայց, իհարկե, այն տեսողական գործիք է: 
Ինսթագրամի առանձնահատկությունը նրանում է, որ ինսթագրամի օգտատերերը գեղեցկություն են սիրում և ստեղծում, այսինքն` այնտեղ չեք տեսնի ինչ-որ սելֆիների շարք, անորակ վիդեոներ, այնտեղ մարդիկ խնամքով են ընտրում, հարյուրավոր լուսանկարներից ընտրում են ամենալավը: Ինսթագրամը հաղորդում է, որ սա գեղեցիկ աշխարհ է կամ աշխարհի գեղեցկությունն է այս հարթակում: Եվ դա պետք է հաշվի առնել, եթե ձեր բիզնեսը գովազդում եք ինսթագրամով: Եվ այստեղի հետևորդները շատ շնորհակալ աուդիտորիա են, հենց որ տեսնում են, որ իրենց ուզածն եք տալիս, անմիջապես սկսում են հետևել:
Լինքդինը պրոֆեսիոնալ հարթակ է, այն ի սկզբանե ստեղծվել է աշխատանքի հայտարարություններ տեղադրելու համար, իսկ հիմա մի քիչ փորձում է փոխել ձևաչափը: Գովազդն այստեղ մի քիչ ավելի թանկ է: 
Բայց ունի մի շատ հզոր գործիք, որը բավական մեծ տեսանելիություն է ապահովում: Slide Share հատված ունի, որտեղ բիզնեսների մեծ մասը տեսանյութ է դնում ամեն ինչի մասին և լրիվ անվճար: Այսինքն ցանկացած թեմայով կարող եք նյութ գտնել այդ հատվածում, իսկ վճարովի հատվածում նաև ձեր բիզնեսի տվյալները կարող եք լրացնել:
Բիզնեսը պետք է շատ բան փորձի ու հասկանա, թե որտեղից է շատ հաճախորդ գալիս ու որ սոցիալական ցանցն է իրեն պոտենցյալ հաճախորդ բերում, ունիվերսալ ոչինչ չկա:
Հեղինակ` Ժաննա Ավագյան
