«Ոսկե ծիրան» միջազգային կինոփառատոնի այս տարվա մարքեթինգային քայլերը
Երեւանի «Ոսկե ծիրան» միջազգային կինոփառատոնն այս տարի 16-րդ անգամ իր դռները կբացի կինոսերների առջև, այն այս տարի աշխարհի տարբեր երկրներից ստացել է մասնակցության ավելի քան 740 հայտ: Փառատոնը կմեկնարկի Կաննի միջազգային կինոփառատոնում «Ոսկե արմավենու ճյուղ» այս տարվա դափնեկիր Չուն-Հո Պոնի «Մակաբույծը» (Հարավային Կորեա) ֆիլմով: «Ոսկե ծիրան»-ի հատուկ հյուրն այս տարի կլինի Կաննի «Լավագույն ռեժիսոր», «Ոսկե կինոխցիկ», «Ժյուրիի մրցանակ» եւ շուրջ 4 տասնյակ այլ միջազգային մրցանակների դափնեկիր, մեքսիկացի հանրահայտ կինոռեժիսոր Կառլոս Ռեյգադասը։
«Ոսկե ծիրան» միջազգային փառատոնի մեկնարկին՝ հուլիսի 7-ին, Շառլ Ազնավուրի հրապարակում կկայանա հոբելյանական պատվո աստղերի տեղադրում Բագրատ Հովհաննիսյանի 90, Արման Մանարյանի 90 եւ Գենադի Մելքոնյանի 75-ամյա հոբելյանների առիթով:
Հուլիսի 7-14-ն անցկացվելիք 16-րդ Երեւանի «Ոսկե ծիրան» միջազգային փառատոնի շրջանակում կիրականացվեն մի շարք ծրագրեր՝ Հայաստանում արտասահմանյան դեսպանությունների ու միջազգային կազմակերպությունների հետ համագործակցությամբ: Հունիսի 28-ին հրավիրված մամուլի ասուլիսի ընթացքում ՀՀ-ում հավատարմագրված երկրների դեսպանները, դեսպանությունների ներկայացուցիչները, ինչպես նաեւ միջազգային կազմակերպությունների ղեկավարները ներկայացրել են փառատոնի օրերին իրականացվելիք համատեղ ծրագրերը։
Կազմակերպիչների փոխանցմամբ փառատոնային ամբողջ տեղեկատվությունը հասանելի է լինելու www.gaiff.am կայքի եւ նորաստեղծ GAIFF հավելվածի միջոցով, որը հասանելի է Android եւ IOS համակարգով աշխատող հեռախոսների համար: Այս տարի առաջին անգամ պայուսակներ, շապիկներ և պաստառներ են վաճառվելու:
Պաստառների հեղինակը դիզայներ Վիլյամ Կարապետյանն է, ով ոչ դասական մոտեցմամբ տվել է տարբերվող ու «կրեատիվ» լուծում:
«Ոսկե ծիրան» 16-րդ միջազգային կինոփառատոնի պաշտոնական բացման արարողությունը տեղի կունենա հուլիսի 7-ին, Կ. Դեմիրճյանի անվան մարզահամերգային համալիրում, որն ավանդաբար կմեկնարկի կարմիր գորգի արարողությամբ: Կինոփառատոնի փակման արարողությունն արդեն տեղի կունենա հուլիսի 13-ին՝ «Մոսկվա» կինոթատրոնում: