Joomag-ի Marketing Strategist Նանա Մարդոյան
-Համաձա՞յն եք այն մտքի հետ, որ կոնտենտ մարքեթինգն այժմ ամենապահանջված ու աշխատող գործիքն է:
— Ընդհանրապես ամբողջ աշխարհում կոնտենտ մարքեթինգը հիմա առաջնային տեղում է: Այլ կերպ այն անվանում են Inbound marketing, որը տեխնոլոգիապես ուրիշ ուղղվածություն ունի, Growth hacking և այլն: Բայց այդ ամենի հիմքում ընկած է կոնտենտը, որը ստեղծվում է քո նպատակային լսարանի ուշադրությունը գրավելու, ինչպես նաև նրան կրթելու, նրա մեջ հետաքրքրություն ու վստահություն առաջացնելու, որն էլ կբերի վերջնական արդյունքի` ինչ-որ գործողության/զանգ, ինչ-որ ձևաթուղթ լրացնել, մեկնաբանություն գրել և այլն/:
— Իսկ ինչպե՞ս ճիշտ օգտագործել այդ գործիքը:
-Կարևոր է մարդու ենթագիտակցությունը հաշվի առնել և ճիշտ կազմակերպել Customer journey-ն. երբ դու մի բան ես ուզում գնել, ենթագիտակցորեն անցնում ես մի քանի փուլ: Դրա համար բրենդը, կոնտենտ ստեղծելիս, պետք է հաշվի առնի մարդու Customer journey-ի էտապները:
Դրանք մի քանիսն են.
Awareness, երբ դու պետք է մարդուն հնարավորինս կրթես, օգնես դուրս բերել իր խնդիրը, քանի որ շատ դեպքերում նա ինքն էլ չգիտի իր խնդիրը որն է:
Consideration, երբ դու հստակ հասկացել ես խնդիրը և սկսում ես մարդուն առաջակել հնարավոր տարբերակներ, որ նա էլ որոշում կայացնի: Այստեղ նույնսիկ կարելի է համեմատական կոնտենտ ներկայացնել. հիշենք լվացքի փոշիների կամ ափսեների մաքրման հեղուկների գովազդները:
Decision, որտեղ դրդում ես, որ մարդը շփվի քեզ հետ, այսինքն` լինի մեկ քայլ մոտ վերջնական որոշում կայացնելուն:
Երբ այս երեք փուլը փակվում է, մարդը սովորական Unknown visitor-ից դառնում է քո Customer-ը, ու սկսվում է բիզնեսի համար այս շղթայի ամենակարևոր փուլը: Բիզնեսի համար կարևորագույն չափանիշ է հավատարիմ հաճախորդներ ունենալը, որոնք էլ ապահովում են բիզնեսի վերականգնվող եկամուտը: Հնարավոր չէ անընդհատ գումար ծախսել նոր մարդկանց բերելու համար, քանի որ այդ շրջանը կարող է տևել մինչև մեկ ամիս: Հետևաբար շատ կարևոր է կոնտենտ մարքեթինգի ռազմավարությունը մշակելիս մտածել 2 ուղղությամբ`նոր հաճախորդների ներգրավում և եղածների պահում:
-Որո՞նք են կոնտենտ մարքեթինգի առավելությունները:
-Նախ` կոնտենտ մարքեթինգը որպես մեթոդոլոգիա այնքանով է լավ, որ բավականին շատ օգնում է խնայել գովազդային բյուջեն. նախկինում միլիոններ էին ծախսվում տարատեսակ գովազդային արշավների վրա:Դու հետաքրքիր կոնտենտով մարդուն բերում ես, կրթում ես, ու հավանականությունը, որ նա կմնա հավատարիմ հաճախորդ, շատ մեծ է, որովհետև նա գիտակցաբար է գնում այդ քայլին:Երբ ձեր ուղեղը նախապես պատրաստ է գնում կատարելուն, դուք գիտեք թե այդ արտադրանքը գնելն ինչ կտա ձեզ, ապա ավելի շատ եք ուզում դա գնել, քան թե գնելուց հետո փորձարկումներ անել: Երբ բիզնեսը չի բացատրում իր ապագա հաճախորդին, թե ինչի համար է իրեն պետք տվյալ արտադրանքը, նա վաղ թե ուշ փախչելու է: Կոնտենտ մարքեթինգն ինքն իրենով մի քանի մասից է բաղկացած` Creation, Distribution, հետո գալիս է դրա Measurement-ը` չափելիությունը: Ցանկացած բան, որ ստեղծում ես, պետք է հասկանաս էֆֆեկտիվ է, թե ոչ ու ինչն է պետք լավացնել: Բայց այս ցիկլից առաջ էլ կարևոր է պլաննինգը, որ հասկանաս, թե ով է քո Ideal client-ն, ում համար դու կոնտենտ ես պատրաստելու:
-Իսկ որքանո՞վ է այն ունիվերսալ, կա՞ն ոլորտներ, որտեղ կիրառելի չէ:
-Հիմա ամբողջ աշխարհն ու ամեն ինչ գնում է դեպի թվային դաշտ: Այսինքն` ցանկացած դեպքում, երբ դուք ուզում եք շփվել ձեր հաճախորդի հետ, պետք է նրան կոնտենտ տրամադրեք: Եթե, օրինակ, դուք ունեք մեքենայի անիվների խանութ, իհարկե, դժվար թե ձեր հաճախորդներն ամեն օր ձեր մասին սոցմեդիայում գրառում կարդան: Բայց կարող եք ձեր ռազմավարության մեջ այնպիսի ֆորմատ ընտրել, որ գոնե կարողանաք չափելի դարձնել արդյունքը: Օրինակ` այս դեպքում կարելի է հետաքրքիր բլոգային գրառումներ անել: Կոնտենտ մարքեթինգն ամենուր է, ուղղակի պետք է հարմարեցնել տվյալ բիզնեսին:
— Կոնտենտ մարքեթինգի ֆորմատներից որո՞նք են ամենատարածվածն ու աշխատողը:
-Կոնտենտ մարքեթինգի ֆորմատների մասին խոսելիս պետք է առանձնացնել B2B-ի և B2C-ի համար: Օրինակ` վերջինիս դժվար կարողանաք White paper-ով կամ Research-ով հետաքրքրել: Բայց երկուսի պարագայում էլ դեռ ամենաշատ ուշադրություն գրավողը վիդեոկոնտենտն է, բայց ոչ երկար`15-30 վյրկ, մաքսիմում 1 րոպե: Մարդիկ ուզում են immediate justification: Նոր տենդենց է նաև բլոգային գրառումը, որովհետև բլոգի ֆորմատով դուք մարդկանց ինչ-որ հետաքրքիր նյութ եք տալիս կարդալու: Եթե մարդը բծախնդիր է, իրեն վիդեոն հերիք չէ, նա ուզում է նաև կարդալ ու համեմատել: Հետևաբար` երկորդ տեղում ես կառանձնացնեի բլոգը: Բինզեսների համար շատ է օգտագործվում White paper-ը, Case study-ն, Podcast-ը, բայց վերջինը Հայաստանում դեռ տարածված չէ:
-Իսկ ի՞նչ թերություններ, թույլ կողմեր ունի մարքեթինգային այս գործիքը:
-Քանի որ կոնտենտ մարքեթինգի նպատակներից է նաև այնպես անել, որ բրենդը դառնա ճանաչելի ու որոնողական համակարգերը քեզ հնարավորինս շատ գտնեն, տեքստային կոնտենտի դեպքում խնդիրներ են առաջանում: Շատ դեպքերում խեղդում են տարբեր տեսակի ոչ լիարժեք ինֆորմացիայով հոդվածներ կամ նյութեր տեղադրելով, հետո այնպես են անում, որ տվյալ հրապարակումը բարձրանա վերև, բայց իրականում այն սխալ ինֆորմացիա է պարունակում ու խանգարում նաև ձեր կոնտենտին: Որպես կոնտենտ մարքեթինգի մինուս կարող եմ նշել այն, որ ցավոք ոչ միշտ է կոնտենտն իրական լինում, լինում է արհեստական, մտացածին: Կնշեմ մեկ թույլ կողմ էլ` կոնտենտ մարքեթինգը ժամանակատար է: Այն երկարաժամկետ նախագիծ է, բայց հետևողական լինելու դեպքում, նրա տված արդյունքը շատ ավելի կայուն ու հիմնային է: Արագ բերվողն արագ էլ գնում է:
Հեղինակ` Ժաննա Ավագյան
