Անվիճելի է, որ մարքեթոլոգը պետք է լավ հասկանա իր թիրախային լսարանի առանձնահատկությունները, որպեսզի կարողանա ստեղծել նրանց համար ակտուալ, հետաքրքիր և անձնավորված կոնտենտ: Ուստի մինչև մարքեթինգային ռազմավարության ձևավորումը պետք է հասկանալ, թե ինչպես են մտածում մարդիկ ու ինչն է նրանց դրդում այս կամ այն գործողության: Ներկայացնում ենք հոգեբանական մի քանի հնարք, որոնց պետք է ուշադրություն դարձնել։
- Փոխադարձ փոխանակում։ Սա ցանկությունն է շնորհակալ և երախտապարտ լինել որևէ մեկին այն բանից հետո, երբ նա ձեզ համար ինչ-որ լավ բան է արել: Երախտագիտության զգացումն առաջանում է այն ժամանակ, երբ շրջապատող մարդիկ անմիջական են ու պատրաստ են օգնել ձեզ: Այս հնարքի՝ մարքեթինգում կիրառման օրինակ է հաճախորդին նվեր անելը: Դա կարող է լինել անգամ մի սիմվոլիկ շապիկ, էլեկտրոնային գիրք կամ ձեռքով գրված բացիկ:
- Պարտավորվածություն։ Մարդիկ չեն սիրում չկատարել խոստումները. եթե մարդն ինչ-որ բան է խոստանում, ենթագիտակցորեն ձգտում է կատարել դա: Սա կարող ենք կապել նաև առաջին կետի հետ, քանի որ մարդիկ, ստանալով նվերներ, կցանկանան կապի մեջ մնալ տվյալ բրենդի հետ: Նոր հաճախորդներին մատուցելով որակյալ ծառայություններ ու պիտանի կոնտենտ, տրամադրելով հատուկ զեղչեր ու նվերներ՝ կապահովեք նրանց վերադարձը։
- Դեֆիցիտ։ Սա շատերին հայտնի հնարք է, երբ պարտադիր նշվում է որևէ սահմանափակում՝ «Առաջին 100 տոմսը գնի՛ր կես գնով», «Ինտերնետ մարքեթինգի դասընթաց: 70% զեղչ միայն 2 օր» և այլն: Սա ընդգծում է ապրանքի էքսկլյուզիվությունն ու բարձրացնում դրա հանդեպ պահանջարկը:
- Նորության խաբկանք։ Սա հետաքրքիր հոգեբանական ազդեցություն է, որն առաջանում է այն ժամանակ, երբ մարդն, առաջին անգամ տեսնելով ապրանքը, սկսում է այն ամենուր նկատել: Սա իրականացնելն այժմ ավելի իրական է դարձել ինտերնետային հարթակներում՝ շնորհիվ ռեմարքեթինգի։
- Սոցիալական ապացույցներ։ Հետազոտությունը ցույց է տվել, որ մարդիկ ավելի հակված են հավանել ու վստահել նրան, ինչը երաշխավորված է իրենց ծանոթների կամ մտերիմների կողմից։ Օրինակ՝ ավելի հակված են հավանել սոցկայքերում ձեր էջն այն ժամանակ, երբ այն հավանածների շարքում տեսնում են իրենց ընկերներին:
