Որևէ բիզնեսի, մեծահարուստի, աշխարհում կատարվող ֆինանսական իրադարձության մասին լսելիս կամ կարդալիս հաճախ ենք հանդիպում «ըստ Ֆորբսի» արտահայտությունը:
Իսկ ե՞րբ Forbes անունը դարձավ հեղինակություն, ո՞վ էր հեղինակը:
digest-ն անդրադարձել է հայտնի ֆինանսական լրագրող Բերթի Չարլզ Ֆորբսին (անգլ. Bertie Charles Forbes):
«Պետք է վճարել հաջողության համար: Գրեթե բոլոր նրանք, ովքեր հասել են հաջողության, աշխատել են տքնաջան և շատ, ջանասիրաբար ուսումնասիրել են և պլաններ կազմել, զոհաբերել են իրենց, ավելի մեծ դժվարություններ են հաղթահարել, քան մեզանից յուրաքանչյուրն, ով դեռ չի բարձրացել»,-ասել է Բերթի Չարլզ Ֆորբսը:
Բ. Չ. Ֆորբսը շոտլանդական ընտանիքից, դերձակի 10 երեխաներից 6-րդն էր: Ծնվել է Շոտլանդիայի Աբերդինշիր մարզի Նյու Դիր գյուղում (New Deer is a settlement in Aberdeenshire,) 1880 թվականի մայիսի 14-ին: Աշխատել սկսել է մանկուց, 14 տարեկանում թողել է դպրոցն ու անցել պատահական աշխատանքի՝ որպես գրաշար՝ հույս ունենալով, որ իրեն միանգամից կվստահեն ստեղծագործական աշխատանք, որին այդքան ձգտում էր: 7 տարի անց վերապատրաստվել է որպես սղագրող (ստենոգրաֆ), որն այդ տարիներին պարտադիր պայման էր լրագրողների համար, այնուհետև անցել լրագրողական աշխատանքի տեղական թերթերից մեկում:
1904-ին Ֆորբսը լքել է Շոտլանդիան: Սկզբում մեկնել է Հարավային Աֆրիկա, այնուհետև՝ ԱՄՆ: Նրա առաջին աշխատավայրը՝ «The Journal of Commerce» անտիկ ժուռնալն էր, որը լույս էր տեսնում 2 շաբաթը մեկ անգամ և առանձնապես ոգեշնչող չէր, բայց Ֆորբսին տվեց ժամանակակից ամերիկյան բիզնեսի մասին հասկացողություն: Քիչ-քիչ Բ. Չ. Ֆորբսն ամսագրում իր աշխատանքին զուգահեռ սկսեց սյունակներ գրել այլ հրատարակչությունների համար և ստեղծել իր անունը որպես էկոնոմիկայի չոր խնդիրների մասին վառ ու ցայտուն գրող հեղինակ: Շուտով նրա ջանքերը նկատում է մեդիամագնատ Ուիլյամ Ռանդոլֆ Հըրսթն (անգլ. William Randolph Hearst), ով տարիքով ավելի փոքր էր և ամբիցիաներով: Նա աշխատանք է առաջարկում Բ. Ֆորբսին իր «New York American»-ում: Ժամանակի ընթացքում Ֆորբսն, իր տաղանդի և քաջության շնորհիվ, դառնում է ամենահայտնի ֆինանսական լրագրողը: Նա չէր վախենում կտրուկ քննադատել հարուստ և հաջողակ մարդկանց և վշտանում էր, երբ իր հայտարարությունները խմբագրվում էին խմբագրի կողմից: 1917-ին Բ. Չ. Ֆորբսը հիմնադրեց մի ամսագիր, որը ցանկանում էր անվանել «Doers and Doings», բայց ընկերներից մեկի խորհրդով կոչեց իր անունով: Բ. Չ. Ֆորբսի կյանքի ընթացքում նրա ամսագիրն այդպես էլ չդարձավ առաջատար. հայտնվեցին ավելի հաջողակ մրցակիցներ, ինչպիսիք են՝ «Business Week»-ն ու «Fortune»-ը: Պատերազմի պատճառով ստեղծված ֆինանսատնտեսական մեծ ճգնաժամի տարիներին ամսագիրը չէր վաճառվում, և Բերթի Չարլզ Ֆորբսը խմբագրական ծախսերը վճարում էր այլ հրատարակչություններից ստացվող լրագրողական հոնորարներից: Բ. Չ. Ֆորբսի ժամանակ ժուռնալի շրջանառությունը չի գերազանցել 100 հազար օրինակը, ինչը բավականին համեստ թիվ է Միացյալ Նահանգների համար:
«Forbes»-ի հիմնական արժանիքն այն էր, որ նա նոր դարաշրջան ստեղծեց բիզնես-հրատարակություններում: Պարզվեց, որ կարելի է խոսել կապիտալիստների մասին, որոնք թվում էին կամ ձանձրալի պուրիտաններ, կամ անողոք շահագործողներ, բայց և այնպես, հետաքրքիր էր տեսնել նրանց մեջ լուսավոր մարդկանց՝ իրենց անհատական հատկանիշներով, արտառոց պատմություններով:
Ըստ Forbes.ru-ի «Forbes»-ի առաջին համարը 15 ցենտ է եղել՝ 2,8 դոլար ժամանակակից արժեքով:
2017-ին լրացել է «Forbes»-ի 100-ամյակը:
«Forbes»-ի հետագա գործունեությունը շարունակել է Բ.Չ. Ֆորբսի որդին՝ Մալքոլմը, ով էլ հարթել է ժուռնալի ճանապարհը դեպի հայտնիություն: Այժմ «Forbes»-ի գլխավոր խմբագիրը ժուռնալի հիմնադիր Բ.Չ. Ֆորբսի թոռն է՝ Սթիվ Ֆորբսը (անգլ. Steve Forbes):
Առավել մանրամասներ կարող եք կարդալ՝ անցնելով հետևյալ հղումով.
https://www.forbes.ru/biznes/100-let-forbes349241-berti-forbs-shotlandec-izmerivshiy-ameriku
Հեղինակ՝ Մարինե Գասպարյան
