Դավթյան ոսկերչական ընկերության մենեջեր Արմեն Դավթյան
-Ոսկերչությունը մեր պարագայում ժառանգաբար փոխանցվող արհեստ է, այն մեր արյան մեջ է, մեզ փոխանցվել է հայրիկից և այն պետք է շարունակեն մեր երեխաները: 1974թ. մեր հայրն է սկսել զբաղվել ոսկերչությամբ, իսկ մենք այժմ շարունակում ենք նրա սկսած գործը: Ընտանեկան բիզնես է, եղբայրներով ենք ներգրավված այս գործում, վերջին 10 տարվա ընթացքում մասնակցել ենք աշխարհի տարբեր երկրներում 80-ից ավելի միջազգային ցուցահանդեսի: Իսկ եղբորս 13-14 տարեկան երեխաները մանկական ցուցահանդեսի բացմանն են մասնակել և ներկայացրել մեր արտադրանքը: 10.000-ից ավելի զարդերի նմուշներ ունենք:
—Միջազգային ցուցահանդեսներին մասնակցությունն ինչքանո՞վ է ընկերությունը հայտնի դարձնում Հայաստանում:
-Հայաստանից դուրս էֆֆեկտն ավելի շատ է: Եթե մշտապես ներկայացված ես լինում մի ինչ որ ցուցահանդեսի, այնտեղ ավելի շատ է լինում ճանաչելիությունը, որտեղ գալիս են տարբեր երկրներից ընկերություններ, հետո հետագայում սկսում է ձևավորվել համագործակցություն մասնակից ընկերությունների միջև:
—Այսինքն՝ ցուցահանդեսները շահութաբե՞ր տարբերակ են ներկայացնելու արտադրանքը:
-Միանշանակ, քանի որ հնարավորություն է ընձեռվում տվյալ երկրի տեղական շուկայում հաճախորդներ ձեռք բերել ու պատվերներ ունենալ, կարող է նաև այլ տարբերակ էլ լինել՝ օրինակ՝ հնարավոր է Ղազախստանում ձեռք բերես ռուս գործընկերներ:
—Իսկ միջազգային ցուցահանդեսներին հայկայան մոտիվներով, թե՞ դավթյանական շնչով զարդեր եք ներկայացնում:
-Առհասարակ մեր զարդերի մեջ հայկական շունչ կա, հայկական նախշերին զուգադրում ենք մեր շեշտադրումը. ամեն ընկերություն իր ուրույն մոտեցումն ունի:
—Դավթյանական զարդերի նշաձողը որն է՞:
-Օրինակ 1000-ից ավելի նմուշ ունեցող այս հավաքածուն (ցույց է տալիս) , որի մեջ օգտագործվել է էմալ, ձեռագործ այս մոտեցմամբ չկա ուրիշ ոչ մի ոսկերչական ընկերության մոտ: Հավաքածուն ունի իր միջազգային սերտիֆիկատը և անձնագիրը: 2016թ. Լենինգրադում կայացած ցուցահանդեսի ժամանակ այդ հավաքածուն արժանացավ բարձր գնահատականի, և մեր ընկերությունը գրավեց առաջին տեղը: Ամեն օր այն համալրվում է նոր գործերով: 
—Որտե՞ղ եք վաճառքի հանում զարդերը:
-Համագործակցում ենք տարբեր խանութների հետ: 10-ից ավելի տարբեր խանութներում կարելի է գտնել ընկերության տեսականին, համագործակցում ենք եկեղեցիների, տարբեր հուշանվերների խանութների հետ: Ոսկու շուկայում ունենք մեր վաճառքի տարածքը, դրանից բացի արտահանում ենք տարբեր երկրներ:
-Հայաստանում մարքեթինգն ինչպե՞ս եք կազմակերպում էլ ավելի ճանաչելիություն ձեռք բերելու համար:
-Հիմնականում տեղական ցուցահանդեսներն են, և քանի որ 40 տարուց ավելի պատմություն ունի մեր ընկերությունը, հին հայկական վստահության գործոնն է աշխատում. դժվարը մարդու՝ մեզ մոտ առաջին անգամ գալն է, հետո որպես կանոն շարունակում է գալ ու իր հետ բերել ծանոթներին, բարեկամներին, ընկերներին:
-Տեխնիկական զարգացման դարում իրազեկման էլ ի՞նչ տարբերակներ ունեք:
-Մենք պարբերաբար օգտվում ենք մեյլինգի ծառայությունից և մի քանի տասնյակ արտասահմանյան և տեղական ամսագրերում, հեռուստա և ռադիո ընկերություններով հաճախակի գովազդ ենք տեղադրում:
—Իսկ սոցիալական մեդիա՞ն, չէ որ ամբողջ հասարակությունն այսօր ֆեյսբուքում է:
-Եթե համացանցով մեքենա ենք գնում, ապա՝ 3 ամիս էլ կսպասենք մեքենայի տեղ հասնելուն, բայց որպես կանոն զարդերի պարագայում էդ մշակույթն էն մակարդակի չէ, զարդի դեպքում մարդը ցանկանում է շոշափել, ձեռք տալ, կրել, փորձել, հետո նոր գնել:
—Զարդերի դիզայնը, գունային գաման ո՞վ է որոշում:
-Չկա որևէ ուղղվածություն, մեզ մոտ զարդ պատրաստելու հիմքում ընկած է հաճախորդի ցանկությունը, մենք աշխատում ենք անհատական պատվերներով, հասկանալով հաճախորդի միտքը, ցանկությունը՝ մենք նրան ներկայացնում ենք համապատասխան առաջարկներ: Երբ որ հաճախորդը զարդը վերցնում է ձեռքը և իր աչքերում հայտնվում է գոհունակության ժպիտ, ուրեմն՝ գործդ հաջողել է, դու կարողացել ես ստեղծել մի բան, որը դիմացինիդ հաճելիորեն զարմացնում է ու հաճելի զգացողություններ է պատճառում: Հաճախորդները ժպիտը դեմքին մեզ մոտից պետք է գնան: Ազնիվ մետաղը սիրում է ազնիվ մոտեցում. զարդի մեջ կենդանության շունչ պետք է լինի, նրա հետ երկխոսության մեջ պետք է մտնել:
—Ինչքանո՞վ եք կարևորում Ձեր աշխատանքում մարքեթինգի առկայությունը:
-Կարևոր է այնքանով, որ պետք է շուկայի ուսունասիրություն կատարվի՝ հասկանալու համար ինչ պահանջներ կան, բայց միևնույն ժամանակ մենք ինքներս փորձում ենք առաջարկող լինել և թելադրող: Ոսկերչությունը շնչող «օրգանիզմ» է, պետք է լինել զարկերակի վրա, հասկանալ այսօրվա պահանջները, բայց միևնույն ժամանակ չմոռանալ սեփական ձեռագիրը:
—Եվ վերջում ի՞նչ կավելացնեք:
-Օգտվելով առիթից ուզում եմ խորհին շնորհակալությունս հայտնել մեր հաճախորդներին՝ բարձր գնահատականի և վստահության համար, որորվհետև դա աշխատելու և առհասարակ ստեղծագործելու համար շատ կարևոր ու ցանկալի խթան է:
Հեղինակ՝ Մարինե Գասպարյան
